హైదరాబాద్ పోక్సో కేసు: నిందితుడికి 20 ఏళ్ల జైలు శిక్ష విధించిన కోర్టు

హైదరాబాద్ నగరంలోని చాంద్రాయణగుట్ట పరిధిలో మైనర్ బాలికపై లైంగిక దాడికి పాల్పడిన కేసులో 70 ఏళ్ల వృద్ధుడికి ప్రత్యేక కోర్టు 20 ఏళ్ల కఠిన కారాగార శిక్ష విధించింది. పోక్సో చట్టం కింద దాఖలైన ఈ కేసులో హైదరాబాద్ ప్రత్యేక న్యాయస్థానం మంగళవారం ఈ కీలక తీర్పును వెలువరించింది.

2023లో చాంద్రాయణగుట్ట ప్రాంతానికి చెందిన మహమ్మద్ జమీరుద్దీన్ (70) అనే వ్యక్తి మైనర్ బాలికపై లైంగిక దాడికి పాల్పడ్డాడు. బాధితురాలి తల్లిదండ్రుల ఫిర్యాదు మేరకు పోలీసులు కేసు నమోదు చేసి దర్యాప్తు చేపట్టారు. నిందితుడిని అరెస్ట్ చేసి, అవసరమైన సాక్ష్యాధారాలను సేకరించి కోర్టులో ఛార్జిషీట్ దాఖలు చేశారు.

ఈ కేసుకు సంబంధించిన విచారణను ప్రత్యేక పోక్సో కోర్టు నిర్వహించింది. ఇరుపక్షాల వాదనలు విన్న న్యాయస్థానం, పోలీసులు సమర్పించిన సాక్ష్యాధారాలను పరిశీలించి నిందితుడు జమీరుద్దీన్‌ను దోషిగా నిర్ధారించింది. అతనికి 20 ఏళ్ల కఠిన కారాగార శిక్షతో పాటు రూ.5,000 జరిమానా విధిస్తూ తీర్పు చెప్పింది.